يعتبر بند السيراميك من أهم مراحل تشطيب الشقق والفلل لأنه واجهة المنزل الأساسية وأي غلطة فيه بتكلف مبالغ كبيرة، عشان كدا لازم تعرف اجابة سؤال ازاي استلم شغل السيراميك من الصنايعي باحترافية، وتضمن جودة التركيب قبل ما تدفع الحساب النهائي للمبلط وفي المقال ده هنشرح لك خطوات استلام السيراميك بالتفصيل عشان تتجنب مشاكل تطبيل السيراميك أو عيوب اللحامات والعراميس.
ازاي استلم شغل السيراميك من الصنايعي؟
🟢 قائمة “استلام السيراميك” (متخليش الصنايعي يضحك عليك)
1. اختبار التطبيل (أهم خطوة):
خبط بـ “إيد مقشة” أو مفتاح على أماكن متفرقة في البلاطة (خصوصاً الأركان). لو سمعت صوت “فراغ” أو “طبلة”، يبقى المونة ناقصة تحت البلاطة ودي هتتكسر مع الوقت.
2. ميزان الميول (في الحمامات والمطابخ):
كب شوية ميه في أبعد نقطة عن “البيبة”. الميه لازم تجري بسرعة ومن غير ما توقف في أي حتة (تكون “مسطرة”) لغاية ما تنزل في الصرف.
3. استقامة اللحامات (العراميس):
بص بعينك على طول الخط الواصل بين البلاطات. لازم يكون “خيط واحد” طوالي وعرضي، مفيش بلاطة مرحلة ملي واحد عن اللي جنبها.
4. اختبار “السِن” (الاستواء):
مشي إيدك على الفواصل بين كل بلاطتين. لو حسيت إن في بلاطة “عالية” عن التانية (بنسميها في السوق “سن” أو “سوكة”)، ده عيب تركيب واضح وهيضايقك جداً في المشي والمسح.
5. تربيعة الزوايا:
في الأركان اللي هيركب فيها (دولاب أو مطبخ)، اتأكد إن الزاوية قائمة (90 درجة). لو الزاوية “مفتوحة”، هتلاقي فراغ كبير وبشع ورا العفش بعد ما يركب.
6. الغلايق (قطع السيراميك الصغيرة):
اتأكد إن “الغلايق” محطوطة في الأماكن المختفية (ورا الباب أو تحت العفش)، مش في نص الصالة أو في وش الداخل.
7. جودة الترويبة (سقية اللحامات):
اتأكد إن الترويبة داخلة لجوه الفواصل ومملية كويس، ومفيش فيها “سوس” (خروم صغيرة) ولازم تكون متساوية مع وش البلاطة.
8. الوزرة (نعلة الحائط):
اتأكد إن “الوزرة” ماشية مع لحامات الأرضية (اللحام في اللحام)، وإنها ثابتة كويس ومفيش وراها فراغات.
القي نظرة هنا: ما سعر متر البلاط اليوم في مصر ؟ اقل من 80ج للمتر
أهمية فحص السيراميك بعد التركيب
خطوة الاستلام مش مجرد شكل جمالي لكنها فحص فني للتأكد من عمر السيراميك الافتراضي، لأن التركيب الخلط بيؤدي لكسر البلاط مع مرور الوقت أو خروج الترويبة من مكانها وصعوبة التنظيف، ومن هنا كان لازم كل صاحب شقة يكون عنده قائمة استلام فنية يراجع ورا الصنايعي فيها بكل دقة.
حمل من هنا : ازاي استلم السيراميك من الصنايعي( موقع تبليط)، قائمة الاستلام لمراجعتها مع الصنايعي عند استلام الشغل.
خطوات استلام السيراميك من المبلط
- أول حاجة لازم تعملها هي اختبار تطبيل السيراميك وده بيتم عن طريق الخبط الخفيف بآلة خشبية أو يد مقشة على أماكن مختلفة في البلاطة الواحدة، ولو سمعت صوت مكتوم يبقى المونة كويسة ولو سمعت صوت رنة فراغ يبقى السيراميك ده فيه تطبيل، وهيحتاج يتفك ويتغير لأنه هيكون عرضة للكسر مع أقل حمل.
- ثاني نقطة هي فحص استواء البلاطات أو ما يسمى في السوق المصري السوكة والسن، وده بيتم عن طريق تمشية إيدك على الفواصل بين البلاط ولو حسيت إن في بلاطة أعلى من التانية ولو بمليمتر واحد يبقى الشغل فيه عيوب تركيب ومحتاج مراجعة لأن العيوب دي بتبان جدا مع الإضاءة الجانبية وبتضايق في المسح.
استلام ميول السيراميك في الحمامات والمطابخ
ميول الأرضية هي أهم نقطة فنية في استلام سيراميك الحمامات وعشان تتأكد إن الشغل تمام لازم تستخدم ميزان الميه أو تعمل اختبار الميه الفعلي، ودا عن طريق كب كمية ميه في أركان الحمام وتراقب حركتها ولازم الميه تجري مباشرة باتجاه البيبة ومن غير ما توقف في أي زاوية أو تعمل برك صغيرة في نص الأرضية.
فحص اللحامات والترويبة والوزرات
لازم تتأكد إن العراميس أو اللحامات بين البلاط كلها مقاس واحد وعلى خط مستقيم واحد، وده بيبان بمجرد النظر لخطوط الطول والعرض في الصالة والطرقة كما يجب التأكد من إن الترويبة أو سقية السيراميك داخلة لعمق الفواصل وممسوحة كويس ومفيش فيها أي ثقوب أو فراغات بتسرب ميه تحت البلاط، أما بالنسبة للوزرة أو نعلة الحائط لازم تكون راكبة بقوة ومفيش وراها فراغ ومطابقة للحامات الأرضية عشان الشكل العام يكون متناسق.
تعرف على: بسعر اقل من 40 ج للمتر ..ارخص سيراميك فى مصر
تربيع الغرف وتوزيع الغلايق
الصنايعي الشاطر هو اللي بيوزع الغلايق، وهي قطع السيراميك الصغيرة في الأماكن المختفية ورا الأبواب أو تحت العفش وبيخلي البلاط الكامل في نص الغرفة وفي المداخل، وعشان كدا لازم تتأكد إن تربيع الغرف سليم وزوايا الحوائط قائمة خاصة في الأماكن اللي هيركب فيها مطبخ أو دواليب ملابس عشان متلاقيش فراغات كبيرة ورا الخشب بعد التركيب.
في نهاية المقال بننصحك دايما بالاتفاق مع المبلط على الاستلام بميزان الميه واختبار التطبيل قبل صرف الدفعة الأخيرة من المصنعية لأن ده حقك كصاحب بيت وبيضمن لك تشطيب فاخر يدوم لسنين طويلة من غير صيانة، وننصحك كمان بمتابعة موقعنا للمزيد من المعلومات وازاي تحمي نفسك من غش الصنايعية.
لا توجد تعليقات